Qaysi reklama sotyapti? Kreativ tahlili: lid narxi emas, sotuv bo‘yicha

“Qaysi reklama sotyapti?” — targetolog ham, biznes egasi ham har hafta beradigan savol. Ads Manager unga lid narxi bilan javob beradi, lid esa hali sotuv emas. Quyida — kreativ tahlili sotuv bo‘yicha qanday qilinishi: jadvalda nimaga qarash, nimani to‘xtatish, nimani ko‘paytirish va hukm chiqarishdan oldin qancha kutish. Raqamlar — real hisobotdan.

Nega Ads Manager qaysi reklama sotayotganini ko‘rsatmaydi?

Lid formali kampaniyada Meta (Facebook va Instagram) ko‘radigan oxirgi hodisa — yuborilgan forma. Qo‘ng‘iroq, uchrashuv va to‘lov undan keyin, CRM’da bo‘ladi. Avtomaktab misolida (02–08.10.2026) Meta bir haftada 863 ta lidni sanadi; shu haftadagi 36 ta sotuv esa CRM’da yopildi — CRM xabar bermasa, Meta sotuv haqida bilmaydi.

Shuning uchun Ads Manager’dagi saralash bitta savolga javob beradi: qaysi reklama formani arzon to‘ldirtiryapti. Qaysi biri sotayotganini bilish uchun CRM’dagi natijani o‘sha reklamaning yoniga qo‘yish kerak.

Lid narxiga qarab qaror qilinsa nima bo‘ladi? 79 ta lid — 0 ta sotuv

Bitta avtomaktab, bitta hafta (02–08.10.2026), ikki kreativ. Birinchisida lid 0,87 $ — akkaunt bo‘yicha o‘rtacha lid narxidan (1,03 $) arzon. Ikkinchisida 1,28 $, ya’ni birinchisidan 47 % qimmat. Lidlar soni deyarli teng: 79 va 77 ta.

Dastur ekrani · capip.uz

Lid narxi bo‘yicha birinchi kreativ yutadi. Sifatli lid narxi bo‘yicha ham: 3,29 $ va 3,80 $. Ya’ni CPL’ga ham, CPQL’ga ham qarab qaror qilinganida, birinchisiga byudjet qo‘shilar, ikkinchisi esa “qimmat” deb to‘xtatilar edi. Farqni faqat sotuv qatori ko‘rsatdi: 0 ta va 5 ta.

Bundan “arzon lid — yomon lid” degan xulosa chiqmaydi. Xulosa boshqa: lid narxi sotuv haqida hech narsa aytmaydi. Sabablari — “Lid ko‘p, sotuv yo‘q” maqolasida.

Kreativ jadvalini qanday o‘qish kerak?

Jadvalda har bir kreativ — bitta qator. Ustunlarning bir qismi reklama kabinetidan, bir qismi CRM’dan keladi va har biri boshqa savolga javob beradi.

Jadvalni oxiridan o‘qing: avval sotuv, keyin sifatli lid, lid narxi esa eng oxirida. Odatda teskarisi qilinadi: lid narxi bo‘yicha saralanadi va qaror shu yerning o‘zida chiqadi.

Sotuv bermagan kreativlarga qancha pul ketadi?

Birinchi kreativ o‘sha haftada yolg‘iz emas edi.

Bu raqamni ehtiyot bilan o‘qing. Bunday kreativga o‘rtacha 17 $ ga yaqin pul ketgan — shu haftadagi bitta mijoz narxidan (24,58 $) kam. O‘rtacha olganda, ular hali bitta sotuv narxicha ham pul sarflamagan: har birini alohida “yomon” deyishga erta.

Lekin yig‘indi katta: byudjetning 44 % sotuv keltirmadi, Ads Manager’ning o‘zida esa bu ko‘rinmaydi, chunki u sotuvni emas, lidni sanaydi. Shuning uchun ro‘yxat xarajat bo‘yicha saralanadi: avval eng ko‘p pul olgan kreativlar tekshiriladi, maydalari esa lid yig‘guncha kutiladi.

Kreativni baholash uchun qancha kutish kerak?

Sotuv — kam uchraydigan hodisa, shuning uchun kichik sonlar aldaydi. Avtomaktabda shu hafta bitta sotuvga o‘rtacha 24 ta lid to‘g‘ri keldi (863 ÷ 36). 10 ta lid bergan kreativda sotuv bo‘lmasa, bu hech narsani anglatmaydi: o‘rtacha hisobda undan yarimta sotuv ham kutilmaydi. 79 ta lid bergan kreativdan esa taxminan 3 ta sotuv kutiladi (79 ÷ 24). Uchta o‘rniga nol — kamdan-kam tasodif.

Birinchi kreativ — 79 ta lid, 0 ta sotuv — uchinchi qatorga tushadi. Ikkinchisining 5 ta sotuvi ham kichik son: kelasi hafta 3 ta yoki 7 ta bo‘lishi mumkin. Shuning uchun qaror “o‘chirib tashlash” emas, “byudjetni ko‘chirish va keyingi hafta qayta tekshirish”. Lid kam bo‘lsa, haftani emas, 30 kunni oling.

Har hafta nimani to‘xtatish, nimani ko‘paytirish kerak?

Haftada bir marta, bir xil tartibda. Qo‘lda bu — Ads Manager va CRM’dan eksport hamda Excel’da birlashtirish; CAPI Platform hisobotida hammasi bitta jadvalda turadi.

1. 1

   O‘tgan hafta va oxirgi 30 kunni oching

   Kreativ nomi bo‘yicha guruhlang: bir xil nomli e’lonlar bitta qatorga yig‘iladi. Hafta nima o‘zgarganini ko‘rsatadi, 30 kun esa xulosa uchun yetarli sonni beradi.

2. 2

   Lid narxi bo‘yicha emas, xarajat bo‘yicha saralang

   Pul eng ko‘p ketayotgan qatorlardan boshlang: xato qaror o‘sha yerda eng qimmatga tushadi.

3. 3

   Har bir qatorni N bilan solishtiring

   Lidlari N dan kam kreativga tegmang. N dan 3N gacha bo‘lsa, sifatli lid va CPQL’ga qarang. 3N dan oshgan va bitta ham sotuvi yo‘q kreativ — to‘xtatishga nomzod.

4. 4

   Byudjetni ko‘chiring

   Sotmayotganini to‘xtating, sotayotganiga qo‘shing. CAPI Platform’da e’lon, ad set yoki kampaniya jadvalning o‘zidan to‘xtatiladi va qayta yoqiladi (egasi yoki admin; Meta tokenida ads_management ruxsati kerak).

5. 5

   Qarorni yozib qo‘ying va keyingi hafta tekshiring

   Bir qator yetadi: nimani, qachon va nega o‘zgartirdingiz. Keyingi hafta to‘xtatilgan kreativning eski lidlari sotuvga aylandimi — kogorta usulida ko‘ring. Aylangan bo‘lsa, uni qayta yoqing.

To‘xtatiladigan kreativ qanday ko‘rinadi?

Ikki xil bo‘ladi. Birinchisi — lidlari yetarli, sotuvi yo‘q: quyidagi kartadagi kabi 79 ta lid va 0 ta sotuv. Ikkinchisi — pul sarflab, bitta ham sifatli lid bermagan kreativ. Bu yerda kutish shart emas: sifatli lid sotuvdan ancha oldin ma’lum bo‘ladi. CAPI Platform hisobotidagi “E’tibor bering” bloki byudjetning 5 % va undan ko‘pini sifatli lidsiz sarflagan kreativlarni o‘zi ko‘rsatadi.

Dastur ekrani · capip.uz

Ko‘paytiriladigan kreativ qanday ko‘rinadi?

Sotuvi bor va bitta sotuv narxi akkaunt o‘rtachasidan past: ikkinchi kreativda 19,74 $, butun akkauntda 24,58 $. Byudjetni birdaniga emas, bosqichma-bosqich oshiring va har hafta qayta tekshiring: byudjet o‘sganda lid narxi ham, sifat ham o‘zgarishi mumkin. Lidning “qimmat” ko‘rinishi kreativni to‘xtatishga sabab emas.

Dastur ekrani · capip.uz

Jadvalga ishonish uchun nima kerak?

Kreativ jadvali uch narsa joyida bo‘lsagina to‘g‘ri gapiradi.

• CRM’da bosqichlar yuritiladi. Qaysi bosqich “sifatli lid”, qaysi biri “sotuv” ekani sotuv bo‘limi bilan kelishilgan va menejerlar lidni shu bosqichlarga o‘z vaqtida o‘tkazadi.
• Lid o‘z e’loniga bog‘langan. Meta lid formasidan kelgan lid aniq bog‘lanadi. Sayt arizasi uchun reklama havolasidagi UTM belgisida e’lon ID’si bo‘lishi kerak. Direct, WhatsApp, Telegram yoki qo‘ng‘iroq orqali kelgan lidlar e’longa avtomatik bog‘lanmaydi: hisobotda ular kanal bo‘yicha ko‘rinadi.
• Qatorlar emas, odamlar sanaladi. Bir odam ikki marta ariza qoldirsa, bu ikkita lid emas. CAPI Platform hisoboti takroriy lidlarni telefon bo‘yicha birlashtiradi.

Qaysi kreativ sotayotgani ma’lum bo‘lgach, keyingi qadam — buni Meta’ga ham aytish. CRM’dagi sifatli lid va sotuv Conversions API orqali signal bo‘lib qaytadi; kampaniyani shu signalga qanday sozlash — sifatli lidga optimallashtirish haqidagi maqolada.